مش قادر اسامح!! انسان في الدنيا بيتاذي …درجات الالم اللي بيحس بيها بيخليه يقدر يسامح او لا …

فكره اللي مش بيقدر يسامح (ضعيف) ..مش صح لانها مشاعر زي الحزن والفرح و الغضب لازم تاخد وقتها وهتروح ولكن محتاج نوظفها بطريقه صحيحه ..

ليه مش قادر اسامح

علشان مركز مع مشاعر الاذي جدا ..بالاضافه لو انت شايفه عايش حياته عادي جدا ولا كأن في اي حاجه ..وجعك بيزيد فاحيانا رغبه الانتقام وانك تاخد حقك بتزيد ..

اقولك علي حاجه

فكره التسامح هي (اختيار)..لما بتسامح بيكون تسامح لنفسك مش للطرف اللي اذاك ..يعني كانك بتقول لنفسك (ايوه انا اتاذيت وتالمت من فلان ولكن انا مش هضغط علي نفسي تاني ..مش هديلك اهتمام ..لكن حقي عند ربنا ..)

وتكمل حياتك علي قد ما تقدر تكون افضل واحسن في الاول هتلاقي صعوبه بس لما هتقل ضغطك لنفسك ..افكارك هتهدا ..

طيب اللي اذاني فين حقي منه ..

حقك محفوظ هيجي في الوقت الصح اللي هيكون مناسب ليك ( ان الله لاينسي حق عباده ولكن يؤجل لما فيه الخير ليهم)

في ناس بتجليها حقها دلوقتي …والبعض بعد شهور وهكذا ..

طيب هو عايش حياته عادي ..

في3 انواع من ناس ..

1-واحد ربنا مسلط عليه نفسه مخليه مش واخد باله هو بيعمل ايه او اذي مين لغايه لحظه معينه ربنا بيكون عالم بيها كل حاجه تتقلب ضدده (الغفله)

2-والتاني عارف انه اذي ومكمل حياته ولا كان فيه حاجه و(كبره) بيزيد وبردوا دا تسليط للنفس عليه

3-وفي الاخير بعد ما بياذي يرجع يصلح اللي فات

الفيصل في كل دول ..نوايا وتربيه نفس وربنا هو الوحيد اللي عالم نفوس الناس فيها ايه …بس تاكد كل اللي ليه حق عند شخص هيرجع

المطلوب مني ايه :

تعرف انك لما بتسامح فدا ليك انت …علشان نفسيتك وصحتك وان دا اختيار انك تسامح اللي اذاك او لا ..ولكن الاساسي بسامح نفسي من كتر تفكيري وضغطي عليها ..

واترك الامور لله هتتحل وهتيجي بيسر

لو انت لسه خارج من علاقة ، حياتك متلغبطة ومحتاج تعرف ازاي تتعامل مع نفسك و ترجع لحياتك عادي اقرا مقالة ما بعد الانفصال